曼聯今夏第一簽　狼隊鋒將領先

曼聯剛於主場0比1不敵狼隊，刷新隊史英超最差紀錄，不過賽後盛傳，「紅魔鬼」已同狼隊進攻主力馬菲奧斯根夏接近簽約，雙方進入洽談個人條件階段，曼聯今夏第一簽隨時係佢！

英國多間傳媒以及「轉會專家」羅曼諾同時報道，馬菲奧斯根夏受英超多隊關注，曼聯處於領先位置，其解約金為6,250萬鎊(約6.48億港元)，狼隊希望收取全費，為符合財務公平條例，容許曼聯分期付款。

據報曼聯正與根夏接觸，談判個人條件，曼聯對於根夏感到滿意，視之為重建鋒線重心，將會擔任魯賓艾摩廉343體系嘅左中場，而根夏亦表態唔介意曼聯來季冇得踢歐聯，願意同曼聯由低做起。

25歲嘅根夏出道初期踢過德甲同西甲，2023年初由馬體會轉投狼隊，至今上陣87場入32球，今季交出16球4助攻，上輪作客奧脫福，就係佢博得罰球畀沙拉比亞射破奧拿拿大門，賽後有人睇到艾摩廉在球員通道同根夏打招呼。