熱刺加入搶「福仔」　做孫興民接班人

拉舒福特今年2月初被曼聯外借去阿士東維拉後，表現出色，但維拉仍未決定是否買斷呢位27歲英格蘭國腳，根據《Football Transfers》爆料，熱刺有意加入爭奪「福仔」，希望用佢作為孫興民接班人。

拉舒福特上場英超對曼城，射入1球12碼，為阿士東維拉上陣17場入4球及5次助攻，表現備受認可。根據借用合約，維拉今夏有權以4,000萬鎊(約4億港元)買斷拉舒福特，但會方仍未有行動。據悉熱刺密切關注拉舒福特情況，一旦維拉放棄收購，呢支倫敦勁旅就會向曼聯提出簽入「福仔」。

事實上，熱刺早於1月已經想簽拉舒福特，但被維拉捷足先登，由於孫興民即將33歲，今季狀態大不如前，上陣43場只入11球，拉舒福特同孫興民都係司職左翼及前鋒，「福仔」無疑係接替「老孫」合適人選。