阿迪達認衰：唔應該將歐聯作為藉口

阿仙奴被水晶宮逼和2比2之後，猶如將今季英超冠軍拱手讓畀利物浦，賽後領隊阿迪達承認球隊踢唔出應有水準，唔應該將備戰下周三(30日)凌晨歐聯4強首回合主場對巴黎聖日耳門(PSG)，作為失分藉口。

阿迪達對於兵工廠今場表現感到失望：「球隊踢得非常艱難，對手部署值得稱讚，為我哋製造唔少麻煩，我哋兩度領先，但踢唔出最佳水平，球員狀態唔穩定，未能完全掌握比賽節奏，當中有部分表現令人失望。」

呢位西班牙少帥透露，有多位球員因為受傷，或者狀態不足，導致缺席操練，希望佢哋能夠盡快復元。阿仙奴踢完下周三(30日)凌晨歐聯對PSG後，要等得5月4日凌晨先至再出戰英超主場對般尼茅夫。

由於利物浦只要周日(27日)晚主場打和熱刺，就可以提早捧盃，令到5月11日晚英超主場對阿仙奴變成「褪色大戰」。