佐真奴今夏離隊　下一站巴甲

根據「轉會權威」記者羅曼諾(Fabrizio Romano)爆料，阿仙奴中場佐真奴費路將於今夏約滿自由身離隊，但並唔會去沙特阿拉伯掘金，最大機會加盟巴甲球隊法林明高。

佐真奴費路2023年1月由車路士轉投阿仙奴，合約將於6月底屆滿，由於呢位33歲意大利國腳年紀漸大，狀態大不如前，今季英超僅上陣14次，近期受到傷患困擾，預料阿仙奴唔會同佢續約。

雖然曾傳出有沙特球會想簽入佐真奴費路，但羅曼諾最新指法林明高已經向佢開出加盟待遇條件。事實上，佐真奴費路本身係巴西人，2007年加入意甲球隊維羅納青年軍，2014年轉投拿玻里，打出名堂，並選擇代表意大利國家隊，成為捧2021年歐國盃冠軍功臣，佢或者會考慮「衣錦還鄉」返巴西搵食。

另外，阿仙奴準備同另1位中場湯馬士柏迪續約，雙方將展開會談。