人棄我取　維拉有意簽奇雲迪布尼

曼城中場奇雲迪布尼未獲續約，將於今夏自由身離隊，去向備受關注，根據英國《每日郵報》爆料，阿士東維拉計劃簽入呢位33歲比利時國腳，意味奇雲迪布尼下季有機會繼續踢英超。

阿士東維拉主帥艾美利認為球隊缺少1位具創造力嘅中場指揮官，奇雲迪布尼無疑係合適人選，打算簽佢提升組織攻勢能力。不過，呢位中場大腦現時周薪高達40萬鎊(約400萬港元)，維拉未必負擔得起，會方正在討論方案，盡量提供具吸引力條件，說服奇雲迪布尼加盟。

盛傳意甲球隊科木教練法斯加斯亦準備游說奇雲迪布尼加盟，另有多支美職、沙特阿拉伯球隊想簽佢。奇雲迪布尼曾經表示，中東球會開出嘅薪酬非常吸引，但佢近日轉口風，話唔排除留喺英超，令維拉有機可乘

另外，維拉準備向巴黎聖日耳門(PSG)買斷翼鋒馬高阿辛斯奧，轉會費為1,500萬歐元(約1.3億港元)，呢位29歲西班牙國腳2月被PSG外借去維拉後表現出色，上陣16場入8球。