英超冠軍即將到手　利物浦喪賺19億

阿仙奴尋晚失分後，利物浦最後5輪只要再攞1分，聯賽冠軍就到手，據報「紅軍」今季英超封王，將可獲得1.847億鎊進帳(約19億港元)，認真和味。

有統計指出，利物浦今季收入共分4部分，英超基本分帳為9,500萬鎊，英超冠軍獎金為5,640萬鎊，本地電視轉播收入為2,520萬鎊，海外電視轉播收入為810萬，加埋就有1.847億鎊。

除咗利物浦收入豐厚，有分析指，利物浦贏英超對英國足球發展大有好處，共分4點，首先係足球成功唔一定需要大灑金錢；其2技術型球員大放異彩；其3係頂級球員有一定自由度；其4係領隊並非球隊焦點。

分析指，上述4點打破近年曼城壟斷，以及阿仙奴等球隊將足球打法「結構化」等不足，令到更多不同類型球員都有爭標可能，並吸引更多中立球迷觀賞英超，大利英國足球發展。