卡馬雲加提早收咧　無緣世冠盃

皇馬中場卡馬雲加上場西甲對基達菲，勇戰受傷，經過檢查之後，證實左腳內收肌肌腱完全撕裂，預料會缺陣一段長時間，唔只緣盡今季餘下賽事，並且無法為「銀河艦隊」出戰6月中展開嘅世冠盃。

卡馬雲加上仗入替受傷嘅中堅阿拉巴，但呢位22歲法國國腳踢到比賽末段都傷埋，賽後教練安察洛堤已經表示，2人將缺陣周日(27日)凌晨西班牙盃決賽對巴塞隆拿。卡馬雲加嘅傷勢比預期嚴重，可能需要休息2至3個月，所以世冠盃都唔使預佢。

另外，皇馬中場靈魂人物祖迪比寧咸自從2023年11月整傷左肩之後，傷勢一直未斷尾，可能踢完世冠盃後做手術，一旦開刀需要長抖5至6個月，勢必影響皇馬下季備戰工作。