獲皇馬垂青　麥亞里士打霸氣回應

利物浦右後衞阿歷山大阿諾特好大機會今夏轉投皇馬，近日盛傳隊內中場阿歷斯麥亞里士打亦被「銀河艦隊」睇中，呢位26歲阿根廷國腳立即作出澄清，並發表效忠宣言，講明冇打算轉會，各位球迷可以放心。

據悉皇馬計劃簽入1位頂級中場接替即將40歲嘅老將莫迪歷，目標人物包括安素費南迪斯、阿歷斯麥亞里士打，無獨有偶2人都係阿根廷國腳。阿歷斯麥亞里士打被傳媒問到上「艦」傳聞，佢立即否認：「我效力利物浦，感到非常開心，獲得球會尊重，並唔需要轉投其他球隊，亦冇諗過離隊，甚至根本唔應該講呢個話題。」

阿歷斯麥亞里士打2019年由小阿根廷人加盟白禮頓後，逐漸打出名堂，利物浦2年前以3,500萬鎊(約3.5億港元)轉會費將佢收歸旗下，簽約5年。麥亞里士打穩坐主力位置，上季為利物浦各項賽事上陣46場入7球及7次助攻，今季46次披甲亦有6球進帳及5次助攻，水準非常穩定，呢位中場硬漢對紅軍一片忠心，領隊施洛及球迷可以放下心頭大石。