約基利斯向皇馬自薦　慘食檸檬

士砵亭瑞典神鋒約基利斯今季打出名堂，受到各大豪門關注，不過凡事總有例外，據報約基利斯心繫皇馬，要求經理人向皇馬自薦，結果慘被皇馬會長皮里茲拒絕。

約基利斯出道早期僅在德乙同英冠等球隊打滾，直至2023年加盟士砵亭，同時任主帥魯賓艾摩廉合作，其足球事業先至起飛，艾摩廉過檔曼聯後，力邀佢今夏轉投「紅魔鬼」，但佢嫌棄曼聯成績太差拒絕，不過呢個世界人揀你你揀人，佢想去皇馬同樣「食檸檬」。

西班牙傳媒報道，約基利斯拒絕曼聯後，正同阿仙奴、車路士、利物浦、馬德里體育會等多間豪門周旋，其中同阿仙奴已展開談判，但同時佢又指示經理人同皇馬接觸。

皇馬對於約基利斯自薦感到意外，不過「老佛爺」唔願意喺佢身上花費巨額轉會費，而且皇馬中前場已經夠人，並無增兵需要，因此斷然拒絕。