PSG留力輸波　今季歐洲5大聯賽再冇不敗之師

周六(26日)凌晨法甲，已提早奪冠嘅巴黎聖日耳門(PSG)留力踢下周中歐聯4強首回合，結果主場以1比3不敵尼斯，被打破今季聯賽不敗之身。PSG輸波之後，意味今季歐洲5大聯賽再冇不敗之師。

巴黎聖日耳門將於下周三(30日)凌晨歐聯4強首回合作客阿仙奴，教練安歷基今場法甲仍然排出強陣出擊，但球員明顯比較錫身，並未發揮應有水準，踢到34分鐘被尼斯中場辛臣攻入大門。

雖然PSG好快憑法比安彭拿入波扳平，但換邊後唔夠1分鐘，辛臣再入1球，協助尼斯第2度領先，加上中堅尼迪郡耶斯美耶建功，最終尼斯贏3比1，以1分優勢力壓踢少1場嘅里爾，暫時升上第4位，力保參加下屆歐聯希望。

PSG今季踢到第31場聯賽，首嘗輸波滋味，亦係今季英超、西甲、意甲、德甲、法甲最後1支輸波球隊，但相信教練安歷基並唔介意，畢竟球隊已提早捧盃，現時集中力量踢歐聯及5月底法足盃決賽，力爭成為三冠王。