37歲迪馬利亞仍然搶手　至少4隊搵佢

37歲阿根廷老牌球星迪馬利亞同賓菲加合約今夏到期，好大機會返回南美落班，據報「天使」獲得至少4隊斟介，包括兩支阿甲河床、羅沙里奧中央，仲有巴甲及墨超球隊都對佢有興趣。

阿根廷傳媒報道，「天使」可能上演「回家後再回家」，近2季效力賓菲加係佢登陸歐洲首支球隊，兩年前已上演一幕「愛回家」，今夏佢即將離開賓菲加，極可能返回佢真正母會羅沙里奧中央，雙方正在接洽。

不過近日河床準備介入爭奪，並希望在6月初同賓菲加尚未真正約滿前安排轉會，令佢可以代表河床出戰今夏世冠盃，河床仲打算簽埋賓菲加另一球星奧達文迪，而且迪馬利亞係河床球迷，加盟機會唔低。

迪馬利亞另外亦收到來自巴甲同墨超邀請，總之今夏重返美洲，仲有大把出路。