哈利卡尼黃牌夠數　下輪德甲封王之戰停賽

周六德甲賽事，聯賽榜前兩位拜仁慕尼黑同利華古遜雙雙贏波，拜仁繼續領先利華8分，尚餘最後3輪，拜仁下輪德甲贏波即封王，前鋒哈利卡尼終可一嚐捧盃滋味，不過剛巧哈利卡尼黃牌夠數要停賽，下輪無緣上陣。

今輪德甲，拜仁主場3比0大勝緬恩斯，利華主場2比0贏奧格斯堡。兩隊齊齊贏波全取3分，兩隊排名及積分距離維持不變，拜仁繼續領先利華8分，下輪德甲只要拜仁贏波，又或利華失分，拜仁都可提前2輪重奪聯賽冠軍。

拜仁攞冠軍唔係新聞，不過哈利卡尼捧盃就係大件事，佢2010年出道至今，等待15年，攞過歐聯亞軍同2次歐國盃亞軍，但就未攞過重要賽事冠軍，今次終於打破宿命，贏得足球生涯首項重要錦標。

之但係哈利卡尼今場對緬恩斯，喺上半場一次普通攔截，被球證出示黃牌警告，計計數佢剛好累積5張黃牌，下輪作客RB萊比錫停賽無緣上陣，無法參與呢場封王之戰。