皇馬「極限施壓」奏效？獲球證放生12碼

皇馬喺西班牙盃決賽前夕，剪輯短片指控今場球證保高斯以往執法不公，對方亦喺記者會反擊，導致「銀河艦隊」要求換證，外界一度猜測保高斯會「大報復」。不過，結果相反，呢位39歲判官「以德報怨」喺補時睇完VAR後，推翻自己吹罰皇馬12碼嘅決定，否則巴塞隆拿可能唔使踢加時，就可以捧盃。

當時踢到補時6分鐘，皇馬中堅魯爾阿辛斯奧喺禁區內踢踢拉芬夏比洛尼，保高斯初時判罰12碼，但其後睇VAR，取消判罰，並指拉芬夏比洛尼「插水」，向佢出示黃牌。如非保高斯公正嚴明，恐怕「銀河艦隊」法定時間已經輸波。

保高斯曾於賽前記者會反擊皇馬指控，聲稱球證執法有時難免出錯，但始終堅持職業操守，果然言行一致。不過，亦有輿論認為，正因為皇馬向保高斯使出「極限施壓」，令佢為避嫌，所以判決比較「鬆手」。

另外，西班牙《馬卡報》爆料，指西班牙裁判委員會原本計劃發表聲明抗議皇馬抹黑保高斯等球證，但被西班牙足總出手制止，以免事態惡化，導致西盃決賽踢唔成。