皇馬輸波又輸人　魯迪格襲擊球證有手尾跟

皇馬輸波又輸人，除咗失落西班牙盃錦標之外，後衞魯迪格喺臨完場時，向球證保高斯掟冰塊，換來紅牌，呢位德國國腳更企圖毆打對方，恐怕將面臨西班牙足總秋後算帳，可能被罰停賽4至12場。

當時魯迪格已經被換離場，加時最後一刻，佢不滿保高斯吹罰皇馬隊友犯規，向對方掟冰塊，雖掟唔中，但保高斯仍然決向佢出示紅牌。魯迪格立即情緒失控，想衝前毆打保高斯，幸好有職球員及時制止佢。另1位被換走嘅皇馬球員盧卡斯華斯基斯向球證提出抗議，及作出粗暴手勢，亦被出示紅牌。

完場後輪到祖迪比寧咸向球證提出抗議食紅牌，換言之皇馬今場有3人「見紅」，左閘費蘭特文迪受傷。

事實上，今場「國家打吡」開波前已經充滿火藥味，兩隊球迷曾經發生衝突，據報有3位巴塞球迷及2位皇馬球迷被執法部門拘捕。