拉舒福特受傷提早收咧　脫「魔」遇阻滯

阿士東維拉喺周日(27日)凌晨英足盃4強，以0比3大敗於水晶宮腳下，領隊艾美利仲公布一個壞消息，向曼聯借用嘅前鋒拉舒福特日前操練時受傷，可能缺陣今季餘下賽事，隨時令維拉放棄買斷佢。

據悉拉舒福特上周四(24日)參加操練期間，整傷腿筋，導致未能出戰今場英足盃4強。主帥艾美利話：「拉舒福特受咗傷，我哋會密切觀察佢嘅情況，未來每場比賽前，都會為佢進行測試，但估計佢可能需要休息數星期。」由於今季英超將於5月25日晚煞科，恐怕「福仔」未能趕及復出。

拉舒福特2月初被曼聯外借去維拉後，表現回勇，上陣17場入4球及6次助攻，根據借用條款，維拉今夏有權以4,000萬鎊(約4億港元)買斷呢位27歲英格蘭國腳，但佢受傷後，可能令維拉管理層卻步。

至於今場英足盃4強，水晶宮憑伊比爾治伊斯射入世界波，加上伊斯美拿沙亞梅開二度，贈維拉3蛋，如非桑馬迪達射失12碼，恐怕維拉唔止輸3球。水晶宮打入決賽後，將會同諾定咸森林對曼城嘅勝方爭冠軍。