艾納斯大勝入亞冠4強　C朗捧盃機會來了

周日(27日)凌晨亞冠精英盃8強，沙特豪門艾納斯憑祖漢杜蘭梅開二度，沙迪奧文尼、C朗各建一功，以4比1大勝日職球隊橫濱水手，晉級4強。C朗自2023年1月加盟艾納斯以來，仍未奪得正式賽事冠軍，現時捧盃機會來了。

今屆亞冠精英盃8強至決賽安排喺沙特阿拉伯舉行，艾納斯變相有地利優勢，今仗佔盡上風，開賽27分鐘，橫濱水手球員解圍失誤，祖漢杜蘭趁機射入打開紀錄，僅過4分鐘，沙迪奧文尼亦建一功。

跟住波索域勁射，橫濱水手門將朴一圭僅僅拍到個波，C朗第一時間凌空補射入網，艾納斯上半場已領先3球。換邊後冇耐，祖漢杜蘭射成4比0，橫濱水手只能靠渡邊皓太入波破蛋。

C朗職業生涯總入球數字增加至934球，向千球大關又行近一步，呢位40歲葡萄牙國腳入波後，做出效力皇馬期間，坐上廣告板嘅經典慶祝動作，似乎暗示自己仍然保持當年顛峰水平。

艾納斯打入亞冠精英盃4強，將遇上川崎前鋒對艾薩德嘅勝方，另一場4強上演「沙特打吡」希拉爾對吉達艾阿里。