A山考慮提早解約　返回南美洲搵食

阿歷斯山齊士今季回巢成名地烏甸尼斯，簽約2年，但英雄遲暮，因為狀態欠佳及受傷問題困擾，各項賽事僅上陣11次，仍未入波或助攻。根據意大利媒體《Messaggero Veneto》爆料，呢位36歲智利前鋒打算今夏提早解約，返回南美洲搵食，可能加盟河床或者智利大學。

阿歷斯山齊士早於2006年已登陸意甲，加盟烏甸尼斯，並打出名堂，2011年被巴塞隆拿收購，踏上球星之路，其後效力過阿仙奴、曼聯、馬賽、國際米蘭等大球會。不過，A山自2018年成「魔」後事業每況愈下，上年夏天離開國米，以自由身重投烏甸尼斯，希望有更多上陣時間，但始終冇起色，好大程度上因為年紀大、機器壞，經常出現傷患，近期受肌肉問題困擾。

據悉A山考慮到身體難以應付歐洲主流聯賽高強度要求，有意返回南美洲比賽，盛傳阿根廷勁旅河床有興趣簽佢。此外，A出自細就係智利大學嘅球迷，想球員生涯尾聲，一嘗效力「愛隊」滋味。