沙拿大爆發VVD夠穩定　成奪標最大功臣

利物浦一眾奪冠功臣當中，最大功勞可以話係一前一後兩位大佬，前有穆罕默德沙拿，後有華基爾雲迪積克（VVD），最神奇係兩人都在續約陰霾下仍然瞓身演出，最終雙雙宣布續約，並重奪英超冠軍，可謂完美結局。

利物浦今季長期佔據榜首，全靠32歲嘅沙拿大爆發，球隊80個聯賽入球當中，沙拿攻入28球18助攻，超過60%入球同佢有關，仲試過一路鬧未續約，一路幫球隊入波！

33歲隊長雲迪積克今季聯賽全部踢足，無論係剷波、搶波、解圍都交足貨，紅軍今季踢咗34輪聯賽，只係失咗32球，VVD可以話係後防定海神針。