國際米蘭輸波折將　面臨「三失」

周日(27日)晚意甲，國際米蘭主場0比1不敵羅馬，被拿玻里搶走榜首，仲有後衞班捷文柏華特受傷，加上射手馬古斯杜林仍未傷愈，兩人好大機會缺陣周四(5月1日)凌晨歐聯4強首回合作客西甲勁旅巴塞隆拿。

開賽15分鐘，國際米蘭就受打擊，班捷文柏華特受傷退下火線，轉個頭就失守，被羅馬中場馬迪亞斯索利射入大門。雖然國米之後傾力反擊，但攻門往往失之交臂，包括阿拿奧杜域近門射高，查漢奴古遠射貼柱出界，杜費斯勁頂被門將史韋拉接實。

羅馬突擊亦非常有威脅，包括多夫碧單刀勁射，但卻高出，最終羅馬維持贏1比0，近11場聯賽取得9勝2和，僅落後第4位祖雲達斯2分，仍有機會奪取下屆歐聯入場券。

至於國際米蘭繼意大利盃4強次回合輸波出局，聯賽亦遭受2連敗，落後榜首拿玻里3分，餘下4場聯賽要反超前並非易事。以國米近期頹勢，加上受傷兵問題困擾，想爭奪歐聯錦標更加困難，面臨「三失」悲劇。