慘情　基艾沙可能冇英超獎牌

利物浦奪得英超冠軍，球隊上下歡天喜地，但翼鋒費達歷高基艾沙斯人獨憔悴，因為呢位27歲意大利國腳今季英超僅上陣4次，隨時冇資格拎冠軍獎牌。

根據英超規例，球員每季最少要上陣5次，先至有冠軍獎牌，費達歷高基艾沙上年夏天由祖雲達斯加盟利物浦之後，因為經常受傷，加上狀態不足，聯賽僅上陣4次。幸好紅軍已經提早捧盃，餘下4場聯賽只屬例行公事，相信領隊施洛應該會畀費達歷高基艾沙上陣，幫佢達到拎冠軍獎牌最低要求。

不過，以基艾沙今季狀況，恐怕就算有牌落袋，都未必可以留隊，盛傳可能今夏重返意甲搵食。