安察洛堤最快一星期離開皇馬　巴西搶住簽

皇家馬德里日前在西班牙盃決賽再度不敵巴塞隆拿，今季好可能「四大皆空」，主教練安察洛堤被炒只係時間問題，據報「肥安」最快1星期內被炒，巴西足總已經準備好，希望第一時間同「肥安」簽約作實，由呢位意大利名帥執教巴西國家隊。

據報指，安察洛堤最快於1星期內離開皇馬，並「非常接近」接掌巴西國家隊教鞭，雙方將於短期內談判。巴西早在2022年世界盃出局後就希望安察洛堤領軍，依家終於等到機會，巴西足總甚至派出專人長駐西班牙馬德里，隨時同「肥安」接觸。

「轉會專家」羅曼諾報道，巴西足總代表身處西班牙，試圖促成協定，佢哋正等待皇馬作出決定，然後跟進後續工作，並非常有信心可以說服安察洛堤接掌「森巴兵團」，如果一切順利，安察洛堤可在6月國際賽檔期就可上任並正式領軍。