華迪想繼續踢英超　狼隊趁機招攬

李斯特城老牌射手占美華迪早前宣布今季收咧後離隊，結束13年「狐狸兵團」生涯，英國《天空體育》最新消息指呢位38歲前鋒希望下季繼續踢英超，狼隊有意簽入佢，代替可能轉投曼聯嘅前鋒馬菲奧斯根夏。

據悉占美華迪之所以決定離開李斯特城，主因係唔想降班踢英冠，所以日前傳出下季英冠新升班球隊域斯咸想簽入華迪，估計唔會成事。

華迪認為自己仲有能力喺頂級聯賽立足，亦無意去美職或者沙特阿拉伯搵食，首選留喺英超。適逢狼隊前鋒馬菲奧斯根夏獲曼聯垂青，轉會費可能達到6,250萬鎊(約6.25億港元)，令狼隊難以拒絕，所以開始物色新射手接替根夏，華迪成為目標，因為呢位英格蘭球星衝刺型踢法，非常適合狼隊戰術要求。值得一提，李斯特城上場英超對狼隊，占美華迪射失12碼，導致輸0比3。

占美華迪今季為李斯特城上陣33場入8球及3次助攻，仍然寶刀未老，如果加盟狼隊，應該有能力佔據一席正選。