艾達臣難敵「油資」利誘　將去沙特掘金

曼城中場奇雲迪布尼早前宣布今夏離隊後，隊內門將艾達臣摩拉斯亦準備走人，根據「轉會權威」記者羅曼諾(Fabrizio Romano)爆料，呢位31歲巴西國腳重提舊事，有意今季結束後，去沙特阿拉伯「掘金」。

上年7月已經傳出沙特豪門艾納斯向艾達臣摩拉斯開出一份90萬鎊(約900萬港元)周薪嘅2年合約，利誘佢加盟，當時呢位鋼門幾乎接受，但曼城主帥哥迪奧拿極力挽留，最終佢改變主意留隊。羅曼諾最新指艾達臣摩拉斯下定決心今夏出「城」，目的地都係沙特阿拉伯，當地有多支球隊想簽入佢。

由於曼城副選門將史堤芬奧迪加今季有不俗表現，加上艾達臣摩拉斯只剩下1年合約，相信哥帥今次唔會阻住佢「發達」。艾達臣摩拉斯現時周薪為18萬鎊，轉戰沙特，人工可望增加4至5倍，曼城5月25日最後1輪英超作客富咸，可能成為艾達臣摩拉斯嘅告別戰。