飛黃騰達　利物浦鐵衞變身中東地產大亨

前利物浦中堅馬馬度沙高上年掛靴之後，進軍商界，變身中東地產大亨，呢位35歲前法國國腳喺阿聯酋杜拜成立一間名為Sakho&Co嘅地產公司，業務遍佈中東、歐洲、非洲，現時飛黃騰達。

馬馬度沙高喺巴黎聖日耳門出道，2013年轉投利物浦，效力紅軍3季，上陣80場入3球，其後轉投水晶宮、蒙彼利埃，上年短暫去格魯吉亞搵食後，決定退休。據悉馬馬度沙高上年11月創業，成立地產公司Sakho&Co，主要業務係豪宅買賣，並提供咨詢及影片製作服務，業務遍佈杜拜、巴黎、非洲國家摩洛哥、塞內加爾。

馬馬度沙高對於成為老闆，感到非常興奮：「終於搵到一種可以融合足球激情嘅生意。」呢位昔日鐵衞經常拍片介紹樓盤，中東多豪客，相信佢應該可以賺到盤滿缽滿。