費倫托利斯成功轉型　做羅拔佬接班人

巴塞隆拿首席射手羅拔利雲度夫斯基近期養傷，一度令人擔憂球隊冇中鋒可用，教練費歷克將翼鋒費倫托利斯推前頂替「羅拔佬」位置，效果出奇地好，被指有西班牙經典射手費蘭度托利斯影子，成為「新費托」，為自己事業開拓新出路。

現年25歲嘅費倫托利斯3年前以5,500萬歐元(約4.9億港元)轉會費由曼城加盟巴塞，但大部分時間表現平平無奇。加上新星拉明耶馬冒起，拉芬夏比洛尼加盟後有出色表現，令同樣司職翼鋒嘅費倫托利斯處境更加尷尬。

幸好新帥費歷克擅於用人，嘗試安排呢位西班牙國腳踢中鋒，證明行得通，上場西班牙盃決賽，費倫托利斯84分鐘射入扳平2比2，為球隊爭取到加時機會，最終反勝皇馬捧盃，佢當選該仗最佳球員。

費倫托利斯今季上陣42場入18球，創職業生涯單季入球新高，西班牙傳媒指佢年輕、走位靈活，屬於「純射手」好材料，加上羅拔利雲度夫斯基已36歲，將來由「新費托」做佢接班人，財政欠佳嘅巴塞可以慳番一筆，唔需要收購新射手。