查漢奴古專剋巴塞　4戰創造4球

國際米蘭將於周四(5月1日)凌晨歐聯4強首回合作客巴塞隆拿，由於射手馬古斯杜林受傷，呢支意甲勁旅攻力面臨打折扣，幸好隊內有1位「巴塞殺手」查漢奴古，曾4次歐聯出戰巴塞隆拿，都有創造入波，包括射入1球及3次助攻，今仗隨時再做主角。

現年31歲嘅查漢奴古早於10年前歐聯分組賽，就試過同巴塞交鋒，當時呢位土耳其國腳效力利華古遜，兩循環賽事，佢各貢獻1次助攻。查漢奴古4年前由AC米蘭轉投國際米蘭，穩佔主力地位，2022年歐聯分組賽，查漢奴古射入全場唯一入球，協助國米主場以1比0擊敗巴塞隆拿，次循環作客貢獻1次助攻打和3比3，換言之，佢4次鬥巴塞，都有創造入波。

查漢奴古今屆歐聯上陣9次有3球進帳及1次助攻，隊內僅次於入8球嘅拿達路馬天尼斯，預料拿達路將面臨對手嚴密看管，查漢奴古後上射門，成為國米入波最大殺着。