雲格回歸、首相撐場　「亞軍奴」有心理關口

阿仙奴相隔16強再踢歐聯4強，酋長球場有唔少稀客到臨打氣，前領隊雲格帶埋囡囡罕見現身，同「阿迷」英國首相施紀賢一齊睇波，可惜結果令人失望。曼聯傳奇球星朗尼表示，阿仙奴球員面臨心理關口，過唔到就注定做「亞軍奴」。

曾執教阿仙奴22年嘅雲格，8年前離隊後絕少返酋長球場睇波，今場佢同囡囡Lea一齊回歸希望見證歷史，並同英國首相施紀賢邊傾邊睇，著名「亞軍奴」施紀賢亦睇得好肉緊，不時雙手合十又手舞足蹈，遺憾阿仙奴最終輸0比1。

曼聯傳奇朗尼表示：「我知道阿迪達一直嘗試傳遞樂觀態度，但得覺得球員有心理關口，佢哋有種『衝線恐懼』。阿仙奴過去同曼城、利物浦一直鬥到難分難解，但喺衝線前總係失之交臂，所以去到終點前就會恐懼失敗，呢個心理關口係必需要克服。我希望阿仙奴捧盃，但佢哋要有呢種自信。」