利物浦爭奪當紅左閘　3大說客幫手搶人

利物浦今季橫掃英超，依家積極為夏季做準備，收購新左閘係主要任務，般尼茅夫嘅「當紅炸子雞」米路斯卻基斯就成為頭號獵物。據報利物浦對呢位21歲新星志在必得，而且出動3大說客「落嘴頭」幫手搶人！

據報卻基斯最近轉去新經理人公司Lian Sports，同費達歷高基艾沙份屬「同門」，Lian Sports上年就促成基艾沙過檔利物浦，良好關係相信有助「紅軍」搶人。另外，般尼茅夫喺2023年向阿爾克馬爾收購卻基斯，當時「話事人」就係現任利物浦總監李察曉士，佢嘅影響力絕對有助收購成事。

最後，卻基斯貴為匈牙利新晉國腳，國家隊「大哥」蘇保斯拉爾嘅說話當然要聽，據報兩人關係極佳，蘇保斯拉爾同卻基斯亦經常喺社交網有互動。消息指般尼茅夫知道好難留住卻基斯，夏天將會索價約4,000萬鎊轉會費放人。