艾納斯4強倒灶　C朗亞冠夢碎

C朗拿度亞冠夢碎！周四(1日)凌晨亞冠盃4強，沙特勁旅艾納斯以2比3不敵川崎前鋒無緣決賽，意味C朗仍然要等待喺亞洲首個冠軍。川崎前鋒將會喺決賽同另一沙特勁旅吉達艾阿里爭逐冠軍寶座。

加盟艾納斯2年仍未贏得正式賽事冠軍嘅C朗，今屆本來係實現夢想大好機會，不過今場面對川崎前鋒犯錯頗多，10分鐘就被伊藤達哉靚窩利攻陷，艾納斯喺18分鐘靠沙迪奧文尼追成平手。

C朗之後有頭槌頂中楣，而川崎前鋒就把握機會，由大關友翔同家長昭博連入兩球，艾納斯完場前3分鐘有艾文耶耶追近至2比3，可惜為時已晚，川崎前鋒贏3比2進身決賽。

完場後C朗表現得相當失落，不過佢賽後表示會捲土重來，喺社交網留言：「有時候夢想係要等待，呢支球隊喺場上付出所有，我覺得好驕傲，多謝所有球迷嘅信任，你哋嘅支持對我哋意義重大。」