國米29%控球入3粒　MK恩3cm詐胡「記一世」

意甲勁旅國際米蘭喺歐聯4強激鬥巴塞隆拿，雖然全場只得29%控球率，但憑住凌厲反擊攻入3球，成為歐聯淘汰賽史上，第1支控球率低於3成但攻入3球嘅球隊，若非米希達利恩嘅「鞋尖越位」慘食詐胡，國米有權贏埋4比3！

國米被巴塞追平3比3後，75分鐘米希達利恩接應杜費斯傳中，禁區內精準送個波入網，不過半自動越位偵測系統顯示，米希達利恩接應傳中前，個鞋尖凸出2至3cm，最終被判入球無效。

米希達利恩賽後表示：「我對呢個詐胡覺得憤怒同難過，我哋本來可以領先，但因為3cm越位，呢個詐胡或者我會記住一世。」對於次回合主場作戰，米希達利恩表示：「我哋知道巴塞有幾強大，但佢哋都有一啲弱點，一定要好好利用，全力以赴爭取理想戰果。」