夏蘭特復操　自揭「尷尬」嗜好

曼城前鋒艾寧夏蘭特喺3月底足踝嚴重受傷，不過周三(30日)重返一隊操練，有望喺球季完結前復出。夏蘭特近期頻頻公開佢做各式各樣治療情況，不過最受網民關注嘅係，原來艾寧夏蘭特係電子遊戲《我的世界》嘅粉絲，揭開呢個保持近2年嘅「尷尬」秘密。

艾寧夏蘭特因足踝韌帶受傷，難得有段「長假期」，唯有靠打機打發時間，日前佢就公開自己鍾情玩《我的世界》，而且已經玩咗幾年。夏蘭特喺2023年打破英超單季入球紀錄後表示：「我唔會諗破入球紀錄，返屋企打機之後就會瞓覺。」當佢被追問玩邊款遊戲，夏蘭特就回應：「唔好講，好尷尬！」

相隔2年後夏蘭特終於揭開秘密，不過唔少網民就話玩《我的世界》完全冇問題，事實上《我的世界》係有史以來最暢銷嘅電玩遊戲之一，遊戲世界係低像素遊戲圖像設計，有唔少工具去發揮無限創意，而利物浦球星阿歷山大阿諾特亦係呢隻遊戲嘅粉絲。