坦哈格準備落班　等緊安察洛堤走人

季尾又係教練大執位嘅時間，據報前曼聯領隊坦哈格成為德甲勁旅利華古遜目標，一旦沙比阿朗素落實加盟皇家馬德里，利華古遜就會向坦哈格提出斟介。

據報皇家馬德里教練安察洛堤已鐵定離隊，雖然同巴西足總嘅口頭協議面臨告吹，但「肥安」離隊幾成定局，沙比阿朗素就早被皇馬會長皮里茲欽點，成為皇馬新帥頭號獵物。

德國《天空體育》報道，利華古遜已做好失去沙比阿朗素嘅打算，而上年10月被曼聯炒魷嘅坦哈格，就被視為合適繼任人。德國《踢球者》亦爆料，指坦哈格喺2013至15球季曾執教拜仁慕尼黑B隊，對德國足球並唔陌生，佢喺阿積士嘅進攻踢法亦好符合利華古遜理念，被視為下任教練最佳人選。