安東尼又轟世界波　成車路士爭冠最大阻礙

周五(2日)凌晨歐協聯4強首回合，車路士繼續展示超班姿態，作客4比1大勝瑞超球隊佐加頓斯，一隻腳已經踏入決賽。另一場4強大戰，貝迪斯有安東尼馬菲奧斯轟入世界波，主場2比1贏費倫天拿，呢位「紅魔舊將」勢成車路士爭冠最大阻礙。

車路士實力遠勝對手，4強大戰照樣將高爾彭馬、摩西斯卡些度等主力擺後備，上半場輕描淡寫由查頓辛祖同馬度基入波領先2比0，換邊後再有後備上陣嘅尼高拉斯積遜「起孖」，就算領先4比0後大意輸番1粒，都無阻佢哋作客大勝4比1。

另一場4強戰就緊湊得多，貝迪斯主場出擊6分鐘由艾沙蘇利入波領先，64分鐘安東尼禁區頂再轟入世界波，不過費倫天拿72分鐘由盧卡雲尼亞里追番1球，令次回合仍然充滿變數。足智彩依家將車路士列為1.3倍冠軍大熱，貝迪斯有4倍列次熱，費倫天拿就有8倍。