PSG神鋒受傷　阿仙奴歐聯反勝有機？

巴黎聖日耳門(PSG)將於周六(3日)晚法甲作客斯特拉斯堡，首席射手奧士文尼迪比利有傷在身，預料無法披甲，隨時影響下周四(8日)凌晨歐聯4強次回合主場對阿仙奴表現，兵工廠有望趁機收復首回合輸0比1失地。

奧士文尼迪比利上場歐聯4強首回合開賽4分鐘，就射入阿仙奴大門，但踢到70分鐘疑似受傷退下火線。PSG周五(2日)發表聲明，指呢位法國國腳拉傷右腳腿筋，雖然傷勢唔算嚴重，但仍然要接受詳細檢查及觀察，希望趕及復出踢歐聯4強次回合主場對阿仙奴。

奧士文尼迪比利今季表現大熟大勇，為PSG各項賽事上陣45場入33球及12次助攻，包括歐聯入8球及3次助攻，如果佢因為受傷影響表現，勢必削弱PSG爭取打入歐聯決賽嘅機會。