希拉爾教練被炒因禍得福　有望執教巴西

希拉爾喺亞冠精英盃4強出局後，會方宣布解僱教練佐治捷西斯，呢位70歲葡萄牙名帥反而因禍得福，有機會「升呢」成為巴西國家隊領隊。

佐治捷西斯曾於2018/19年球季執教過希拉爾，2023年回巢，並協助球隊奪得上季聯賽及國王盃冠軍。不過，希拉爾今季成績退步，落後聯賽榜首伊蒂哈德6分，國王盃更加8強出局，加上亞冠精英盃4強止步，會方忍無可忍決定換帥。

不過，以佐治捷西斯嘅資歷，仍然屬於搶手貨，巴西足總3月將佢，以及安察洛堤、哥迪奧拿列為新帥人選，由於哥帥無意離開曼城，盛傳「肥安」近日同巴西足總談判有阻滯，未必加盟，令佐治捷西斯有望成為「森巴兵團」主帥。

葡萄牙同巴西有深厚歷史淵源，同樣講葡語，巴西足總請佐治捷西斯執教有助同球員溝通，佢曾於2019至20年執教巴甲球隊法林明高，熟悉巴西球壇環境，的確係合適人選。