拜仁賽和萊比錫　哈利卡尼捧盃要等多陣

周六晚德甲，拜仁慕尼黑在半場落後兩球劣勢下，以3比3賽和RB萊比錫，只能搶得1分，尚餘兩輪領先少踢1場嘅利華古遜9分，冠軍仍未到手，今場停賽嘅哈利卡尼暫時未擺脫「無冠魔咒」，想捧盃仲要等等！

哈利卡尼因累積5張黃牌「坐波監」，只能坐在看台觀戰，拜仁今場開局不順，11分鐘被班捷文施斯高突擊成功射空門，RB萊比錫領先1比0，39分鐘RB萊比錫死球攻勢，高路斯達文頭槌頂成2比0完半場。

易邊後拜仁反撲，先在62分鐘，同樣力爭生涯首冠嘅艾歷迪亞頭槌破蛋追成1比2，62分鐘米高奧利斯再追1粒扳平2比2，賽事掀起高潮，末段拜仁狂攻，83分鐘，利萊辛尼右路空晒狂抽破網，為拜仁反勝3比2。

哈利卡尼落咗草地等完場捧盃之際，去到補時階段，尤素夫保臣為RB萊比錫射成3比3，令拜仁仍未封王，仲未可以慶祝住。