歐霸歐協聯全都要！安東尼有望做「歐洲雙冠王」

巴西球星安東尼馬菲奧斯，喺冬天轉會窗由曼聯外借貝迪斯後，表現脫胎換骨，上星期歐協聯4強首回合入波，帶領貝迪斯2比1擊敗費倫天拿，離決賽只差1步。有趣嘅係，安東尼唔單止有機會贏歐協聯冠軍，就有機會拎埋歐霸盃冠軍獎牌，成為罕見「歐洲雙冠王」！

安東尼加盟貝迪斯後，迅即成為球隊核心，7場歐協聯淘汰賽全部正選上陣兼入3球，有機會挑戰冠軍寶座。同一時間，曼聯喺歐霸亦順風順水，入決賽機會高唱入雲，雖然安東尼喺淘汰賽前離隊，但佢喺歐霸聯賽階段有4次上陣紀錄，如果曼聯最終奪冠，安東尼亦夠晒資格分一面冠軍獎牌。

根據歐洲足協條例，只要兩間球會唔係參加同一個賽事，球員係可以代表兩間球會喺同一季出戰歐洲賽，而冠軍球隊會獲發40面獎牌，畀邊個就由球會自行決定。睇番曼聯今屆歐霸上陣紀錄，只有20個球員上陣比安東尼多，呢位巴西球星獲分發獎牌機會好大。