【有片】巴塞輸波又輸人 中堅「放飛劍」喪冇品
去片睇恩尼高馬天尼斯向法蘭斯高阿沙比吐口水
巴塞隆拿喺歐聯4強出局之外，中堅恩尼高馬天尼斯更加涉嫌向對手法蘭斯高阿沙比「放飛劍」吐口水，極之冇品。雖然呢位33歲西班牙國腳避過球證處罰，但已令巴塞蒙羞，輸波又輸人。
當時踢到上半場末段，國際米蘭獲得12碼，查漢奴古準備主射，恩尼高馬天尼斯企圖騷擾呢位土耳其國腳，但並唔成功，查漢奴古勁射入網。法蘭斯高阿沙比行過恩尼高馬天尼斯面前，向佢怒吼，暗寸對方幼稚行為冇用。
恩尼高馬天尼斯老羞成怒，向阿沙比吐口水，令呢位意大利國腳非常不滿，幾乎引起衝突，但球證馬斯歷克睇完VAR後，並冇作出任何處罰，恩尼高馬天尼斯避過食紅牌，都算好彩。
賽後巴塞隆拿教練費歷克仍然批評波蘭籍球證馬斯歷克執法不公，指好多五五波判決都偏向對國米有利，但其實國米今場有5人食黃牌，巴塞隆拿只有2張黃牌。