兩回合創造5球　杜費斯成「巴塞大剋星」

國際米蘭喺歐聯4強兩回合合計，以7比6擊敗巴塞隆拿，右翼衞杜費斯演出光芒四射，兩場合共創造5球，包括射入2球及3次助攻，成為「巴塞大剋星」。

杜費斯喺首回合開賽1分鐘就傳妙傳馬古斯杜林入波，跟住自己梅開二度，來到今場次回合，呢位29歲荷蘭國腳繼續有大勇演出，助攻拿達路馬天尼斯射入打開紀錄1球。戰至補時3分鐘，杜費斯橫傳畀法蘭斯高阿沙比射成3比3，令國米有機會獲得加時。

根據OPTA統計，杜費斯成為歐聯史上第3位喺4強兩回合創造入波「5+」球員，另外2位係1997/98年球季祖雲達斯金童迪比亞路，以及2017/18年球季利物浦前鋒羅拔圖法明奴。不過，當年祖雲達斯、利物浦打入決賽後，同樣不敵皇馬，屈居亞軍，幸好國際米蘭今屆決賽對手唔係呢支西甲豪門，杜費斯有機會成為最後贏家。