拉芬夏追平C朗神紀錄　黯然落淚金球獎凍過水

巴塞隆拿翼鋒拉芬夏比洛尼上場歐聯4強次回合射入1球，今屆賽事總共創造21個入球，追平前皇馬射手C朗2013/14年球季單屆歐聯創造最多入球紀錄。不過，巴塞隆拿出局後，呢位巴西國腳無緣破紀錄，甚至可能痛失今年金球獎殊榮。

拉芬夏比洛尼演出大熟大勇，今季為巴塞隆拿各項賽上陣53場入32球及22次助攻，其中歐聯入13球及8次助攻，換言之創造21個入球，剛好追平C朗2013/14年球季歐聯創造最多入球紀錄(射入17球及4次助攻)。

由於巴塞隆拿已奪得西超盃及西班牙盃冠軍，西甲錦標亦好大機會到手，如果捧埋歐聯，今年金球獎非拉芬夏比洛尼莫屬，但錯失最重要嘅歐聯冠軍寶座後，恐怕呢位28歲翼鋒嘅金球獎美夢隨時破滅，難怪賽後佢不禁流下英雄淚。

另1位巴塞翼鋒拉明耶馬今場亦有出色表現，有14次成功扭過對手，成為歐聯4強史上第2多過人紀錄，僅次於2008年美斯對曼聯一役嘅16次，可惜都係功虧一簣出局。