曼聯捧歐霸盃　坦哈格都有牌落袋

曼聯將於周五(9日)凌晨歐霸盃4強次回合主場對畢爾包，由於紅魔鬼首回合贏3比0，好大機會入決賽。根據歐洲媒體報道，如果曼聯最終奪得冠軍，前領隊坦哈格都會獲得獎牌。

坦哈格上年10月底被曼聯炒魷之前，曾經領軍踢今屆歐霸盃首3場比賽，結果都係和波，勉強算對球隊有貢獻。據悉一旦曼聯成為歐霸盃冠軍，全隊可以獲得50個獎牌，會方可能將部分剩餘獎牌，贈送畀已離隊嘅教練同球員，作為答謝過去嘅付出，坦哈格話晒率領球隊踢過今屆賽事，冇功都有勞，相信曼聯會預留一塊獎牌畀佢。

此外，接替坦哈格擔任看守領隊嘅雲尼斯達萊，上年11月初帶領曼聯喺歐霸盃以2比0擊敗PAOK，打開勝利之門，加上佢做過坦哈格副手，預料紅魔鬼都可能會畀獎牌佢。