去意已決　羅美路同意加盟馬體會

熱刺今季英超成績差，現時僅排16位，即使打入歐霸盃4強，仍然面臨主力流失危機，根據意大利傳媒爆料，中堅基斯甸羅美路已經同馬德里體育會達成協議，將於今夏加盟呢支西甲勁旅。

基斯甸羅美路仍然有2年合約在身，但佢希望另謀發展，加上獲得馬體會教練施蒙尼積極拉攏，所以同意過檔跟隨呢位阿根廷同胞搵食。據悉基斯甸羅美路將會同馬體會簽約至2030年，並有多1年優先續約權，估計熱刺可以獲得5,000萬歐元(約4.4億港元)轉會費。

現年27歲嘅基斯甸羅美路4年前由阿特蘭大加盟熱刺，至今上陣122場，並有7球進帳，今季因為傷患問題，僅24次披甲入1球及1次助攻。馬體會主帥施蒙尼不斷壯大阿根廷幫勢力，包括上年夏天以9,500萬歐元(約8.35億港元)收購曼城嘅阿根廷射手祖利安艾華利斯，如果簽入基斯甸羅美路，隊內將有多達7位阿根廷球員。