【有片】空門飛機！阿仙奴成也沙卡、敗也沙卡
阿仙奴喺歐聯4強次回合作客巴黎聖日耳門(PSG)，破釜沉舟下全力反撲，全場錄得19次攻門，不過除基安盧基當拿隆馬「上身」之外，入球功改布卡約沙卡亦由英雄變狗熊，佢本來有機會喺今場追成2比2，但面對空門竟然炒高，名宿基昂表示：「佢嚟緊3日都會瞓唔着！」
阿仙奴今場輸到0比2(總比數0比3)之後，沙卡好快就回敬一球，亦令佢成為亨利之後，阿仙奴歷來第2個單季歐聯入5球或以上球員。阿仙奴當時氣勢正盛，80分鐘沙卡接應卡拉費奧利傳中，個波已經越過撲出嚟嘅當拿隆馬，點知沙卡面對空門射高，否則最後10分鐘會掀起高潮。
為電視台主持直播嘅名宿基昂話：「呢球會令沙卡好痛苦，佢嚟緊2、3日都唔會瞓得着，不過沙卡可以為自己表現驕傲，紐奴文迪斯成場都冇份進攻，就係因為沙卡喺度。」另一主持、曼聯名將夏格維斯就話：「可能沙卡走漏一眼，又或者當拿隆馬影響到佢，但無論如何，沙卡呢球係一定要入。」