C朗再遭打擊　艾納斯又輸或無緣亞冠盃

周四(8日)凌晨沙特阿拉伯聯賽，艾納斯主場領先2球優勢下，最終卻以2比3不敵榜首伊蒂哈德，跌落聯賽第4位，巨星C朗唔只再次同錦標無緣，甚至面臨冇得踢下屆亞冠精英盃嘅尷尬局面。

開賽3分鐘，艾納斯憑沙迪奧文尼射入打開紀錄，呢位33歲塞內加爾國腳跟住傳畀艾曼耶亞建功，上半場領先2球。不過，換邊後形勢出現大逆轉，伊蒂哈德迅速由賓施馬頭槌破網追番1球，另1位法國球星尼高路簡迪勁射入網，伊蒂哈德扳平2比2。

戰至補時，艾奧亞近門射入，協助伊蒂哈德以3比2反勝絕殺艾納斯，領先第2位希拉爾6分，只剩下4輪聯賽，好大機會奪得冠軍。

反觀艾納斯繼日前亞冠精英盃4強出局後，今場聯賽又輸波，C朗踢足全場，6次射門只有1次中目標，3次嘗試扭過對手都失敗，並有13次失去控球權，表現令人失望。

艾納斯現時落後第2位希拉爾5分，同時少第3位吉達艾阿里1分，能否出戰下屆亞冠精英盃成為疑問。