干地又搶英超兵　拿玻里斟基亞利殊

拿玻里主帥干地上年夏天簽入曼聯中場麥湯米尼，效果極佳，食過番尋味，準備今夏再出手搶英超兵。根據英國《太陽報》爆料，拿玻里今次睇中曼城翼鋒基亞利殊，希望簽入呢位英格蘭國腳，增強實力出戰下屆歐聯。

拿玻里今年1月將基華拉斯基利亞出售畀巴黎聖日耳門後，一直有意收購1位翼鋒填補空缺，曾經力斟曼聯新星阿歷真度加拿祖，但紅魔鬼唔想放人。干地決定轉移目標，向基亞利殊埋手，呢位29歲球星經常受傷，已淪為「藍月亮」副選，盛傳曼城計劃出售佢，拿玻里收購成功機會較大。

據悉干地執教車路士同熱刺期間，已經非常欣賞基亞利殊，認為佢適合自己嘅戰術體系，拿玻里排意甲榜首，已穩奪下屆歐聯入場券，有必要增兵應付呢項大賽，干地將基亞利殊列為首選。

雖然熱刺、阿士東維拉都有興趣簽入基亞利殊，但曼城唔想將佢出售畀英超對手，有望同拿玻里達成交易，問題係基亞利殊現時周薪達30萬鎊(約300萬港元)，如果佢轉投拿玻里，可以需要減人工。