PSG入歐聯決賽　麥巴比被瘋狂嘲笑

基利安麥巴比去年夏天拒絕巴黎聖日耳門(PSG)高薪續約，自由身改投皇家馬德里，被PSG球迷視為叛徒，今季PSG爭氣殺入歐聯決賽，而皇馬可能「四大皆空」，令「麥總」被網民瘋狂嘲笑，就連前隊友基安盧基當拿隆馬都加入「抽水」行列，話麥巴比離隊後PSG團結咗。

PSG殺入歐聯決賽，網民嘲笑麥巴比嘅留言幾乎未停過，體育網站《Touchline》發文指，PSG尚差兩場就贏得三冠王，仲要係麥巴比離隊後嘅首個球季，配上一張轉為黑白色調嘅麥巴比圖片，吸引超過110萬網民查看同留言。

除咗網民，PSG門將基安盧基當拿隆馬仲抵死，佢直言：「麥巴比離隊後，更衣室氣氛好咗好多，我哋依家好團結，情況就好似2021年意大利捧走歐洲國家盃時一樣。」

當拿隆馬繼續話：「我哋好掛住麥巴比㗎，佢係世界最佳球員之一，我都想佢好㗎。」當中不無諷刺成分。