玩晒！安東尼1射1傳　貝迪斯入決賽撼車路士

歐協聯決賽名單出現，西甲嘅貝迪斯將同英超豪門車路士爭霸！貝迪斯喺周五(9日)凌晨4強次回合，靠安東尼馬菲奧斯1射1傳，加時戰作客2比2逼和費倫天拿，兩回合合計贏4比3入決賽，5月29日凌晨喺波蘭嘅弗羅茨瓦夫同車路士爭冠。

首回合貝迪斯贏2比1，今場30分鐘安東尼近30碼罰球妙射破網，不過費倫天拿喺完半場前，由魯賓高辛斯喺8分鐘內連入2球，將總比數追和3比3。下半場兩隊再冇入波，要踢加時分勝負，去到97分鐘，安東尼右路走空，傳中畀艾沙蘇利射入，貝迪斯得以進身決賽。

另一場4強戰，車路士喺首回合作客4比1贏佐加頓斯後，今仗返主場憑達斯貝利賀爾攻入全場唯一入球，1比0再贏該瑞典超球隊，兩回合計大勝5比1闖決賽。足智彩賠率顯示，車路士係1.34倍奪冠大熱，貝迪斯奪冠有2.92倍。(更多賠率：https://bet.hkjc.com/ch/football/chp　)