碧咸上身！美臣蒙特45碼金球盡吐烏氣

曼聯中場美臣蒙特2年前以6,000萬鎊轉會費加盟，但表現一直受到詬病，而且經常受傷令上陣機會大減，不過呢位26歲球星近期發威，繼上場聯賽入波後，歐霸盃4強次回合對畢爾包又入2球，包括一記「碧咸式」45碼驚天遠射，盡吐烏氣。

自美臣蒙特加盟以來，只係幫曼聯入過2球，而且都係作客賽事，今仗係佢首次喺奧脫福入波，其中補時階段入個人第2球非常精彩，佢趁對方門將衝出禁區解圍失誤，喺中場線前少少位置，離門45碼第1時間射入空門。美臣蒙特遠程炮金球：https://x.com/i/status/1920587211742875794　

美臣蒙特賽後感觸表示：「呢球(奧脫福入球)實在等得太耐啦，我有好多傷患，但一直都保持樂觀，深信呢一日終會來臨。我每日都努力練習，等待機會去影響比賽，正如我所講，今日就係我嘅收成日。」