奧拿拿又出事　林寶堅尼遭扣留

曼聯殺入歐霸盃決賽之際，門將奧拿拿又出事，據報佢架林寶堅尼房車遭執法部門扣留，原因竟然係架車冇買保險。

英國傳媒報道，曼聯應付歐霸盃4強次回合期間，奧拿拿星期三將架林寶堅尼借畀朋友使用，就喺曼徹斯特附近被執法人員截查，隨即發現架車冇買保險，結果被拖走扣留。

按規定，奧拿拿必須於14日內辦理贖回手續，首先要證明自己係車主，然後再出示購買保險單據，否則呢架價值35萬鎊(約360萬港元)嘅名車就會被拍賣，或直接銷毀。

資料顯示，曼聯對上一位被扣留車輛嘅球星，就係麻煩友保羅普巴，2021年普巴架勞斯萊斯因為掛住摩納哥車牌喺英國行駛而被扣留，結果佢本人被扣3分，而架車被扣留幾個月，要畀幾千鎊管理費。

有口痕友話：「奧拿拿喺球場內犯過唔少低級失誤，而今次係球場外嘅低級失誤。」