沙拿當選英足球先生　追平亨利紀錄

英超冠軍利物浦再下一城，前鋒穆罕默德沙拿以90%得票率，當選為今季英格蘭足球先生(FWA Footballer of the Year)，成為本世紀最高得票率得主，亦係呢位32歲埃及國腳第3次獲此殊榮，追平阿仙奴傳奇射手亨利紀錄，並列當選次數最多嘅球員。

穆罕默德沙拿今季為利物浦各項賽事射入33球及23次助攻，包括英超有28球進帳及18次助攻，兩項數據都排第1位，成為紅軍捧盃大功臣，順理成章當選今季英格蘭足球先生。

918位有資格投票嘅會員之中有90%人士揀選沙拿，遠遠拋離第2位嘅另1位利物浦主將華基爾雲迪積克，至於第3至5位分別係紐卡素前鋒阿歷山大伊沙克、阿仙奴中場迪格蘭賴斯、曼聯隊長般奴費南迪斯。

沙拿繼2018、2022年後，第3次獲得英格蘭足球先生獎項，同亨利睇齊，由於沙拿表現鶴立雞群，估計今季英格蘭球員先生(PFA Players' Player of the Year)、英超最佳球員獎應該都會成為佢嘅囊中之物。